Serok Mesûd Barzanî di peyama xwe de ku îro Şemî 20ê Tîrmeha 2019an belav kiriye, dibêje: "Piştî buyera terorîstiya roja Çarşemî 17-07-2019, ku li xwaringehekî Hewlêrê çêbû û dîplomatekî Tirkiyê û du hevwelatiyên sivîl ên Kurdistanê bûne qurbanî, bi kêfxweşî ve îro hêzên Asayiş û Dije-Terora Kurdistanê karîn encamderê serekî yê wê tawanê û hevkarekî wî desteser bikin."
Serok Barzanî destxweşiyê li dezgehên ewlehiyê yên Kurdistanê dike û dibêje: "Pir bi germî destxweşî li qehremanên Asayiş û Dije-Teror û hemû dezgehên ewlehiyê yên Kurdistanê dikim ku karîn di zûtirîn dem de tawanbaran desteser bikin û wek herdem îsbat kirin ku cihê baweriyê û şanaziyê ne."
Di beşeke din a peyama xwe de, Serok Barzanî tekezî li ser wê yekê dike,ku Kurdistan ti carî nabe pêgeha terorê û ti tawanbarek jî nikare ji destê dezgehên ewlehiyê yên Kurdistanê xilas bibe û jibo dilsozî û hevkariya li gel saziyên ewlehiyê, spasiya xelkê Kurdistanê kir.
Serok Barzanî wiha dibêje: "Herwiha spas jibo hevwelatiyên xweştivî ku di vê heyamê de alîkar û piştevanê hêzên ewlehiyê bûn. Xelk û dezgehên ewlehiyê careke din îsbat kirin, Kurdistan ti carî nabe pêgeha terorê û ti tawanbarek jî ji çavê xelkê dilsozê Kurdistanê û eloyên dezgehên ewlehiyê yên Kurdistanê winda nabin."
Di dawiya payama xwe de, Serok Barzanî daxwazekê dike û radigihîne: "Her li vir daxwaz ji hemû aliyan dikim, pirsgirêkên xwe nehînin nav Kurdistanê û nebin sedema gihandina ziraran bi xelkê Kurdistanê."
Roja çarşembiyê 17ê Tîrmeha 2019, li xwaringeha HuQQabaz a li Hewlêrê, êrîşek pêkhatibû û di encamê de dîplomatekî Tirkiyê û du welatiyên Herêma Kurdistanê canê xwe ji dest dan.
Piştre roja pênşembiyê, Dijeterora Herêma Kurdistanê di daxuyaniyekê de nasnameya bikerekî êrîşa Hewlêrê aşkere kir û ragihand, navê wî kesî Mazlum Dag, 27 salî û xelkê Amedê ye û daxwaz ji welatiyan kir, her kes her zanyariyek li ser wî kesî hebe, bi zûtirîn dem dezgehên asayişê agahdar bike.
Her îro Şemî 20ê Tîrmehê Dije Terora Kurdistanê di du daxuyaniyên cuda de ragihand, tawanbarê serekî yê êrîşa Hewlêrê, Mazlum Dag û hevkarekî wî yê bi navê Muhemed Bîsmez ji aliyê hêzên wan ve hatine girtin.
