Hevdîtinên Nêçîrvan Barzanî yên di çarçoveya Konferansa Ewlehiyê ya Munîhê de berdewam dikin.
Nêçîrvan Barzanî doh bi gelek lîder û siyasetmedaran re hevdîtinên girîng kiribûn.
Serokê Herêma Kurdistanê, îro jî hevdîtinên xwe didomîne.
Nêçîrvan Barzanî di çarçoveya hevdîtinên xwe de, bi Serokê Koma Vekolînên Stratejîk a UNAMIyê Volker Perthes re civiya.
Serokê Herêma Kurdistanê ji ber rola wê ya erênî ya li Îraq û Herêma Kurdistanê spasiya Neteweyên Yekbûyî kir û pesnê vê rola wê da.
Volker Perthes bal kişand ser peywir û berpirsiyariya koma xwe ya ji bo şopandina kar û xebatên saziyên Neteweyên Yekbûyî yên li Îraq û Herêma Kurdistanê.
Nêçîrvan Barzanî û Volker Perthes mijarên wekî rewşa Îraqê û rûdanên siyasî û ewlehiyê jî nirxandin.
Gelek lîderên cîhanê, pisporên ewlehiyê û siyasetmedar dê di navbera 16 û 18ê Sibatê de tevî Konferansa Ewlehiyê ya Munîhê bibin ku cara 60î ye tê lidarxistin.
Serokê Herêma Kurdistanê Nêçîrvan Barzanî jî yek ji wan kesan e ku tevî konferansê dibe û ew doh çû Munîhê.
Serokatiya Herêma Kurdistanê da zanîn ku dê Nêçîrvan Barzanî bi gelek serok, serkirde û siyasetmedaran re bicive.
