Moskow: Di encama bombebarana artêşa Kîevê de 40 dîlên Ukraynî hatin kuştin

Wezareta Berevanî ya Rûsyayê ragihand, şeva borî, artêşa Ukraynayê bi mûşekên cûreya Himers, ku mûşekên Amerîkî ne, zindanek bombebaran kiriye û di encamê de bi dehan dîlên Ukraynî hatin kuştin û birîndar bûn.

Îro înê wezaretê daxuyaniyek belav kiriye û tê de hatiye: “Artêşa Ukraynayê mûşekek arasteyî navçeyeke komara Donetsk kiriye, ku dîlên Ukraynî tê de bûn, di encamê de 40 serbazên dîl ên Ukraynî hatin kuştin û 75 dîl jî birîndar bûn.”

Di daxuyaniyê de hat diyarkirin, mûşeka ku artêşa Ukraynayê arasteyî zindanê kiriye, ji aliyê Amerîkayê ve hatiye çêkirin û di van demên dawî de dane artêşa Ukraynayê.

Wezareta Berevanî ya Rûsyayê tevî şermezarkirina bombebaranê, behsa wê yekê jî kir ku artêşa Ukraynayê dixwaze bi vê rêyê çavên serbazên xwe bitirsîne û pêşî li xweradestkirina wan bigre.