Birêvebiriya Sûriyeyê: Wezîr negot dê li dijî HSDyê hêz were bikaranîn

Hikûmeta Şamê diyar kir ku Wezîrê Parastinê yê Sûriyeyê tenê behsa “dan û standinên berdewam” ên bi HSDyê re û “amadebûna ji bo hemû bijardeyan” kiriye.

Ajansa Fransî ya Nûçeyan (AFP) ragihand ku Wezîrê Parastinê yê Sûriyeyê Murhif Ebû Qesre li Şamê ji rojnamegeran re gotiye:

“Deriyê dan û standinê bi HSDyê re niha vekirî ye, heger bikaranîna hêzê jî pêwîst bû em amade ne.”

Şêwirmendiya Ragihandinê ya Hikûmeta Demkî ya Sûriyeyê di daxuyaniyeke taybet de ji ajansa Rûdawê re got:

“Wezîr Ebû Qesre behsa bikaranîna rasterast a hêzê nekiriye.”

Di daxuyaniyê de hat gotin ku Wezîrê Parastinê yê Sûriyeyê Murhif Ebû Qesre tenê amaje bi “berdewamiya hevdîtinan a bi HSDyê re û amadebûna ji bo hemû bijardeyên din” kiriye.