Îsraîlê êrişî Hemayê kir: Kuştî û birîndar hene

Medyaya Fermî ya Sûriyeyê (SANA) ragihand ku êriş bi mûşekan hatiye kirin û kuştî û birîndar sivîl in.

Gerînendeyê Nexweşxaneya Niştimanî ya Mesyafê Feysel Heyder da zanîn ku di vê êrişê de 14 kes mirine û 43 kes birîndar bûne.

Feysel Heyder diyar kir ku birînên 6 birîndaran xedar in.

Parêzgarê Hemayê Meen Ebûd jî seriyek da birîndaran û rewş li nexweşxaneyê şopand.

SANAyê ragihand, piştî êrişa Îsraîlê şewatek jî derketiye û hewl tê dayîn agir were vemirandin.

Li hêla din, SANAyê wêneyên terman û hinek birîndaran belav kirin.

Êrişî baregehên leşkerî hat kirin

Çavkaniyên leşkerî yên Sûriyeyê jî ji SANAyê re eşkere kir ku Îsraîlê şeva borî êrişî hinek baregehên leşkerî yên li naverasta Sûriyeyê kiriye. 

Li gorî wan çavkaniyan, di van êrişan de jî 3 kes hatine kuştin û 15 kes birîndar bûne.