Rêber Ehmed di konferanseke rojnamevanî de derbarê pêvajoya aştiyê û biryara çekdanîna PKKyê de got, "Ji bo hêsankirina vê pêvajoyê çi ji dest me were em dê paşguh nekin û ya girîng ew e ku herêmên Herêma Kurdistanê ji pevçûnên çekdarî rizgar bibin."
Wezîrê Karên Navxwe yê Herêma Kurdistanê got, Serkirdayetiya Herêma Kurdistanê her dem piştgirî û palpiştiya xwe ji bo pêvajoyê diyar kiriye û ji bo hêsankirina vê pêvajoyê çi ji dest me were em dê paşguh nekin, hê zû ye ku biryar were dayîn PKK dê çawa û li ku çekan deyne.
Ya girîng ew e ku herêmên Herêma Kurdistanê ji pevçûnên çekdarî rizgar bibin û hemwelatî bikaribin vegerin gund û herêmên xwe û sûdê ji rez û baxên xwe werbigirin û aştî û aramî vegere."
Wezîrê Karên Navxwe pirsa Nûçegihanê Rûdawê Rence Cemal a “gelo dê çi hêz li herêmên di bin desthilatdariya PKKyê de bi cih bibin?” wiha bersivand: "Hê pêvajo di qonaxên destpêkê de ye û dibe ku di pêşerojê de behsa wê babetê were kirin."
Piştî 41 salan ji xebata çekdarî, doh Partiya Karkerên Kurdistanê (PKK) biryar da ku xwe fesix bike û çekan deyne lê pêvajo hîn neketiye qonaxa pratîkî.
PKKyê biryarên kongreya 12an ku bi beşdariya 232 endaman pêkhatibû eşkere kirin.
Li gorî biryaran, “PKK hat fesixkirin, têkoşîna çekdarî qediya û xebatên li ser navê PKKyê qediyan.”
