Nêçîrvan Barzanî û Mihemed Şiya Sûdanî pêwendiyên Îraqê û Herêma Kurdistanê gotûbêj kir.
Piştî civîna bi Sûdanî re tê çaverêkirin Nêçîrvan Barzanî bi berpirsên Çarçoveya Hemahengiyê jî re bicive.
Biryar e îşev civîna Hevpeymaniya Birêvebirina Dewletê jî pêk were û Nêçîrvan Barzanî beşdarî civînê bibe.
Berdevkê Encûmena Bilind a Îslamî ya Îraqê Dr. Elî Dîfa, derbarê civîna îro ya Hevpeymaniya Birêvebirina Dewletê ji Rûdawê re got:
“Pirsgirêkên rêkeftinên siyasî, biryarên Dadgeha Federal a Îraqê, budceya sala 2024an serdana Serokwezîrê Îraqê ji bo Washingtonê û çend pirsên din dê di civîna Hevpeymaniya Birêvebirina Dewletê de bêne gotûbêjkirin.”
Herwiha serkirdeyê Dewleta Yasayê Arif Hemamî jî li ser civînê ji Rûdawê re got:
"Pirsa petrol û budceyê û mûçeya karmendên Herêma Kurdistanê û çend pirsên din dê di civînê de werin gotûbêjkirin.”
Hewpeymaniya Birêveberina Dewletê, hikûmeta Mihemed Şiya Sûdanî pêk aniye û Partiya Demokrat a Kurdistanê (PDK) jî yek ji beşdarên wê hevpeymaniyê ye.
