Sekreterê Giştî yê Wezareta Pêşmerge Cebar Yawer ji Rûdawê re ragihand, di derbarê hêzên Pêşmerge de yek ji mijara sereke ya projeya taybet a bi serperiştiya Amerîka, Brîtanya û Almanyayê ew e ku ji bo veguhastina pêşmergeyên birîndar û gihandina alîkariya lojîstîk, ji hêzên Pêşmerge re helîkopter were dabînkirin.
Cebar Yawer diyar kir: “Herêma Kurdistanê ber bi serxwebûnê ve gavan diavêje û ji ber vê bihêzkirina Wezareta Pêşmerge pêwîst e.”
Hefteya borî ji aliyê Amerîka, Brîtanya û Almanyayê tîmeke berevaniyê ya hevbeş, reşnivîsa planên xwe dane Herêma Kurdistanê ku bi wê planê armanc ew e ku hêzên Pêşmerge bihêztir û profesyonel bibin.
Cebar Yawer aşkere kir, ku di wê planê de 35 xal hene û cîbicîkirina wê planê ji 5 heta 10 salan dê berdewam be.
Encumena Wezîran a Herêma Kurdistanê di civîna xwe ya herî dawî ya roja yekşema 14ê Gulana 2017an de, li ser wê planê rizamendî nîşan da û Wezîrê Pêşmerge di civînekê de ragihand: “Projeya yekkirina Pêşmerge li ser pêkanîna hêzeke hevdem û nûjen, ji bo Wezareta Pêşmerge stratejiyeke gelek giring dabîn dike.”
Berpirsê Buroya Pêwendiyên Derve û Hevahengiyê ya Wezareta Pêşmerge Hejar Îsmaîl ragihand, plan ji 35 xalan pêk tê û piştî qebûlkirina Serokê Herêma Kurdistanê, rasterast dê were cîbicîkirin.
