Li gorî nûçeya ku ajansa Rûdaw'ê de cih girtiye de tê gotin ku, Wezîrê Derve yê Iraqê Îbrahîm Ceferî roja Çarşemê 25-10-2017ê li Peymangeha Peywendiyên Navdewletî ya Moskowê gotarek pêşkeş kir û behsa giştpirsiya serxwebûna Başûrê Kurdistanê û ezmûna Iraqê kir.
Îbrahîm Ceferî axaftina xwe de got: “Iraq niha ji hemû deman bi hêztir e û ti caran jî ji bo dijberiya dewletekê xwe nedaye pişt dewleteke din.”
Her wiha Ceferî behsa Herêma Kurdistanê kir û amaje bi wê yekê kir, ku di Destûra Iraqê de gelek maf û erk ji Kurdan re hatiye veqetandin.
Derbarê referandûma serxwebûnê de Ceferî diyar kir: “Hemû cîhan li dijî giştpirsiyê bû. Yekîtiya Ewropayê, dewletên erebî û kongreya welatên îslamî li dijî bûn lê mixabin Barzanî pêdagirî kir.”
Da xuyakirin, ku wan deriyê guftugoyan bi ser Hewlêrê de negirtiye û li gorî destûrê dê reftarê bi giştpirsiya Başûrê Kurdistanê re bikin.
Derbarê Kerkûkê û destwerdana leşkerî ya Iraqê de de Ceferî got: “Em ne çar bûn herine Kerkûkê. Kerkûk bi petrola xwe dewlemend e. Herwiha Kerkûk nexşeya Iraqê biçûk dike û hemû pêkhate û kêmîne têde ne.”
Derbarê beşdarbûna hêzên Îranê di şerê li dijî pêşmerge de Wezîrê Derve yê Iraqê ragihand: “Ji bilî hêzên iraqî ti hêzeke biyanî di meydana şer de şer nake. Tenê ji bo şêwirmendiyê sûdê ji biyaniyan werdigrin.”
