Besê Hozat, di beşdariya xwe ya 'Bernameya Taybet' a televîzyona Medya Haberê de, rewşa siyasî û biryarên kongreya PKK'ê nirxand. Hozat da zanîn ku Kongreya 12'emîn a PKK'ê, ku li ser banga Abdullah Ocalan di navbera 5-7'ê Gulanê de li dar ket û biryara bingehîn a hilweşandina PKK'ê û bidawîkirina dema têkoşîna çekdarî girtiye.
Lêbelê, Hozat destnîşan kir, bicihanîn û pratîkirina van biryaran rasterast bi çend mercên bingehîn ve girêdayî ye. Wê got: "Rêvebirina vê pêvajoyê, yanî bicihanîn, pratîkirina biryara hilweşandin PKK'ê, rawestandina têkoşîna çekdarî jî tenê bi azadiya fîzîkî ya Rêber Apo ve girêdayî ye. Pêwîst e Rêber Apo bibe xwedî şert û mercên kar û jiyana azad, da ku bi vî rengî Rêber Apo vê têkoşînê bimeşîne."
Hevseroka Konseya Rêveber a KCK'ê herwiha bal kişand ser pêwîstiya naskirina mafê siyaseta demokratîk û li ser vê bingehê pêkanîna guhertinên qanûnî û hiqûqî û got, "Divê Destûra Bingehîn a demokratîk, azadîparêz û wekheviya gelan misoger dike, nasnameya gelê Kurd û gelên li Tirkiyeyê misoger dike, bê avakirin."
Besê Hozat anî ziman, heta ev merc – azadiya fîzîkî ya Ocalan, misogerkirina mafê siyaseta demokratîk û sererastkirinên qanûnî û destûrî – pêk neyên, "bicihanîna biryara hilweşandina PKK'ê û bidawîkirina têkoşîna çekdarî nepêkane."
Derbarê helwesta dewleta TirkIiyeyê de, Hozat rexne li nêzîkatiya AKP'ê girt û weke "bê cidî" bi nav kir.
Besê Hozat careke din tekez kir: "Em bi şênberî dibêjin; tenê Rêber Apo dikare çekê ji destê şervanan bistîne. Ev yek jî tenê bi azadiya fîzîkî ya Rêber Apo dibe."
