Çavkaniyekê ji Rojavayê Kurdistanê ku nexwast navê wî were aşkerekirin, ji Rûdawê re aşkere kir, ku îşev firokeyeke şer a ji corê helîkopterê êrişî navendên leşkerî yên Yekîneyên Parastina Gel (YPG) û Hêzên Senadîd a eşîreta erebî ya Şemer kir.
Li gorî agahiyan ji çavkaniyê Rûdawê ve, wê helîkoptera şer 12 navendên leşkerî yên YPGê û Hêzên Senadîd li bajarokê Çilaxa yê Rojavayê Kurdistanê bombebaran kirin. Heman çavkaniyê ji Rûdawê re ragihand: “Navendên leşkerî yên YPGê û eşîreta erebî ya Şemer ên ku hatine bombebarankirin, li gundên Kînco, Xirab Bajar, Til Elo û Elsefa ne.”
Li gorî çavkaniyê Rûdawê, derbarê zirarên êrişê de hêj ti zanyarî nehatine zanîn.
Çavkaniyê navborî aşkere jî kir, ku “helîkoptera şer li esmanê herêmê digere û li navendên YPGê û Hêzên Senadîd ên ku hatine bombebarankirin, dûkel bilind dibe.”
Eşîreta Şemer di Rêveberiya Xweser a Rojavayê Kurdistanê de beşdar e û hevpeymanê Partiya Yekîtiya Demokratîk (PYD) ye. Bajarokê Çilaxa li Kantona Cizîrê ya Rojavayê Kurdistanê ye û nêzîkî bajarê Dêrikê ye.
Serokê eşîreta erebî ya Şemer, Şêx Himêdî Deham di Rêveberiya Xweser a Rojavayê Kurdistanê de, Hevserokê Kantona Cizîrê ye.
