Tirkiye: Berpirseka PKKê li Silêmaniyê hat kuştin

Ajansa fermî ya Tirkiyê ragihandiye, navê wê rayedara PKKê Delal Azizoglu û ji rêveberên pilebilind ên wê partiyê ye.

Li gor agahiyên heman çavkaniyê, ew berpirsa PKKê di operasyoneke saziya istixbarata wî welatî (MIT) de hatiye kuştin.

Ajansa fermî ya Tirkiyê wiha dibêje: “Yek ji rêvebirên payebilind ên PKKê Delal Azizoglu, di operasyonekê de ku ji aliyê MÎTê ve li bajarê Silêmaniyê li bakurê Iraqê hat lidarxistin, hat berterefkirin.”

Nehatiye diyarkirin ku operasyon kengê û li kudera Silêmaniyê hatiye lidarxistin.

Roja 17ê Hezîranê droneke Tirkiyê otomobîlek li navçeya Kelar a Silêmaniyê bombebaran kiribû û di encamê de 4 kesan jiyana xwe ji dest dabûn û kesek jî birîndar bûbû.

Di heman êrîşê de Ferhad Şiblî Cîgirê Heverokatiya Encûmena Rêveberiya Xweser a Rojavayê Kurdistanê jî jiyana xwe ji dest dabû.