Encûmena Wezîran a Herêma Kurdistanê ji bo du mijarên girîng dicive

Di beşa yekem a civînê de, dê li ser reşnivîsa biryara Encûmena Wezîran a derbarê projeya "Ronakî" gotûbêj bê kirin. Armanca vê projeyê ew e ku xizmetguzariya elektirîkê ya 24 demjimêrî ji bo hemû beşdarên torên kehrebeya niştimanî bi awayekî berfireh û berdewam bê dabînkirin.

Herwiha, di çarçoveya projeyê de, dê li ser rêgirtina li ber zêdexerciyê, hevsengiya di dabeşkirinê de, û parastina jîngeh û tenduristiya giştî jî bê sekinandin.

Di beşa duyem a civînê de, dê raspardeyên wezaretan û aliyên din ên ne girêdayî wezaretan bên nirxandin. Ev rasparde ji bo hevahengî û hevkariya Desteya Hevbeş a Hûrbîniyê ya herdu Dîwanên Çavdêriya Darayî ya Federal û Herêma Kurdistanê ne. Desteya navborî niha mijûlî amadekirina reşnivîsa raporek hevbeş e li ser hûrbîniya darayî ya Herêma Kurdistanê.