Li gundekî Kurdên Şebek teqîn: 3 zarokan canê xwe ji dest dan

Cîgirê Parêzgarê Neynewayê Rifat Simo ragihand, roja Înê li gundê Omerqapçî yê ser bi nahyeya Başîk a Neynewayê ku şêniyê wê Kurdên Şebek in, çend zarokan bi paşmayên DAIŞê dilîstine û di encama teqîna hawanê de 3 zarokan canê xwe ji dest dane û zarokekî din jî bi giranî birîndar bûye.

Cîgirê Parêzgarê Neynewayê Rifat Simo diyar kir ku ji ber barana zêde ew teqemenî li geliyê gund derketiye holê. Zarokan kevir avêtine û di encamê de teqiyaye. Îro li gund şîn hatiye danîn.

Li bakur û rojhilatê Neynewayê nêzî 57 gundên Kurdên Şebek hene. Piraniya wan li nahyeya Başîk a navçeya navendî ya Mûsilê û navçeya Bertle ya navçeya Hemdaniyê ya parêzgeha Neynewayê ne.