Serok Nêçîrvan Barzanî tekeziyê li yekrêziya aliyên Kurdistanî li Sûriyê dike

Serokê Herêma Kurdistanê îro di hevdîtinekê de bi şanda Encûmena Niştimanî ya Kurdistanê li Sûriyê (ENKS) bi serokatiya Serokê ENKSê Siûd Mela de, dawî pêşhat û rewşa Sûriyê û amadehî û rol û bandora hêzên herêmî û navdewletî li navçeyê guftûgo kirin.

Di hevdîtinê de, her du aliyan tekezî li pêwîstiya tebayî û hevqebûlkirinê di navbera pêkhate û aliyan de li Sûriyê û karkirina ji bo çareserkirina pirsgirêkan û vegera ewlehî û aramiyê kirin, nîgeraniya xwe jî ji hewlên guhartina demografiya navçeyê û kar û riftarên çekdarên tundrew ên opozîsyona Sûriyê nîşan dan.