Berpirsê Bernameya Rojhlata Navîn û Afrîqa yê Grûba Krîza Navdewletî Joost Hiltermann piştî serdana xwe ya Rojavayê Kurdistanê ji Rûdawê re axivî û diyar kir; “Amerîkayê xwe xistiye nava sergêjyê de, di demekê de alîkariya YPGê dike, ku ser bi PKKê ye, PKK jî di lîsta terorê ya Amerîka de ye.
Grûpa Krîza Navdewletî bi berdewam raportan li ser Rojavayê Kurdistanê belav dike. Berpirsê Bernameya Rojhlata Navîn û Afrîqa yê ya vê grûbê dibêje Amerîka tenê li hêviya jinavbirina DAIŞê ye û dema DAIŞ hate têkbirin dê vekşe, êdî divê kurd bi xwe pirsgirêkên xwe çareser bikin.
Hilterman herwiha got; “Berjewendiya Amerîkayê ya yekemîn şerê li dijî DAIŞê ye. Hemû derfet û çavkaniyên xwe ji bo wê armancê bikar tîne. Lewma hin caran diçe nav hevpeymaniyeke acêb. Weke mînaak Amerîka bûye hevpeymana YPGê ku ser bi PKKê ye û ji nerîna Hikumeta Amerîka ve, PKK rêxistineke terorîst e. Di heman demê de, pêwendiya bihêz û demdirêj ya Amerîkayê ligel Herêma Kurdistanê û partiyên vir heye. Divê hevsengiya navbera herdu aliyan were girtin.”
Joost Hiltermann amaje bi pêwendiyên Amerîkayê yên ligel Tirkiyê û NATOyê kir û wiha berdewam kir:
“Wate Amerîka di pêgeheke giran de ye û hewl dide hemû aliyan bi corekê ji coran dilxweş bike. Alîkariya leşkerî pêşkêşî YPGê dike, ji bo ku karibe li Reqa û Minbic û Dêrazorê şerê DAIŞê bike. Ev beşek e ji ragirtina hevsengiyan lê di dema bidawîhatina şer de dê Amerîka vekşe. Wê demê pêwîste Kurd bi xwe çareseriyekê ji bo pirsgirêkan bibîne.”
