Bûyer roja Çarşembê 27ê Nîsana 2022ê li bajarokê Barûq ser bi bajarê Miyanduav çêbûye. Li gor şahidhalekî, mêrekî bi hêrs êrîşî mala jineke 75 salî kiriye û destpêkê li wê jinê daye û piştre jî li keç û neviya wê daye û hemûyan yekser canê xwe ji dest dane.
Lê li gor rapora rojnameya Îtîmad, tohmetbar destpêkê êrîşî mala jineke ciwan bi navê Mehnaz Îbrahîmî kiriye û bi kêrê li wê û kurê wê daye. Piştî dike hewar hewar sê jinên din jî hatine derve û di wê demê de êrîşkar êrîşî wan jî kiriye.
Li gor heman rojnameyê kurekî malbata wan hersê jinên kuştî dibêje: “Şeva berê pirsgirêka tohmetbar ligel hevjîna wî hebûye û hevjîna wî çûye mala Mehnaz Îbrahîmî. Roja piştre kesê tohmetbar çûye mala Mehnaz û bi kêrê li Mehnaz û kurê wê daye û bê ti sedemek û bi acizî çûye mala hersê jinên din.”
Di bûyerê de keçeke 18 salî, jin eke 30 salî, jineke 40 salî û jineke bi temen a 75 salî canê xwe ji dest dane.
Dozgerê Giştî yê Miyanduavê Cehangîr Mesûdî jî dibêje: “Tohmetbar hatiye desteserkirin, lê heta niha sedema wê bûyerê zelal nebûye.”
Li gor agahiyên hatine belavkirin, xelkê taxê ji ber hewar hewara wan jinan hatine derve, bi dar û beran li kesê tohmetbar dane û li wir xistine erdê heta polîs hatine.
Rojnameya Îtîmad belav kiriye ku ew mêr hewqasî girêdayî maddeyên hişber bûye, pirsgirêk bo lêkolînan jî çêkiriye.
