Duh roja 15ê Sibatê li bajarê Moskowê yê paytexta Rûsyayê konferanseke navneteweyî ya kurdan hat lidarxistin û gelek partî û saziyên kurdan ji bo vê konferansê hatibûn vexwendin. Yek ji wan partiyan Partiya Demokratîk a Kurdistanê — Îran (PDK-Î) bû û li ser vê partiyê sekreterê wê yê giştî Mistefa Hicrî peyamek şand konferansê.
Hicrî di peyama de balkişand ser guhertinên li Rojhilata Navîn û bandora wê ya li rewşa gelê kurd û ev tişt gotin, "Guhertinên li herêmê pêk tên bandorê li ser qedera gelê kurd dike. Ji ber vê yekê divê her aliyekî Kurdistanê di asta berpirsyariya siyasî û netewî de hewil bide û têbikoşe. Divê her hêz û saziyên siyasî û civakî yên Kurdistanê di çarçoveya berjewendiyên netewî û rizgariya gelê Kurdistanê de pêkanîna yekrêzî û hevkariyê di navbera xwe de bikin armanc."
Mistefa Hicrî balkişand ser ku guhertinên li Rojhilata Navîn pêk tên ji bo kurdan him dikare bibe derfet him jî dikare bibe gef û metirsî. Di vê derbarê Hicrî wisa berdewam kir: "Partî û hêzên Kurdistanî ji bo karibin van guhertinan bikin derfet, beriya her tiştî divê rêzgirtina ji hev re û qebûlkirina hevdu bikin xala sereke. Divê her partî û sazî ji qebûlnekirin, destwerdan û dijberiya hev dûr bisekinin û bi şêweyekî netewî û demokratîk bi hev re pêşengtiya tevgera rizgariya Kurdistanê û bidestxistina serweriya netewî bikin."
Hicrî di peyama xwe de got, "Di şert û mercên niha de her partiyek Kurdistanê dikare heta astekê peywendiyên taktîkî ligel dewletên dagirker deyne lê dema ku ew peywendî zirarê bide strateji û xebatên partî û saziyên wê perçeyê Kurdistanê û ne di xizmeta gelê kurd û yekîtiya netewî de bei divê were bidawîkirin."
Sekretê PDK-Îyê di dawiya peyama xwe de jî got ger partî û hêzên kurd bi yekîtî û zanebûn tevbigerin, roja wê roja kurdan be û serkeftina kurdan jî nêzîk e.
