Ji ber kuştina keça kurd Jîna Emînî xwepêşandan û nerazîbûnên xelkê li piraniya bajarên Îran û temamê Rojhilatê Kurdistanê berdewam dikin û di 24 demjimêrên borî de ji ber guleyên rasterast ên hêzên ewlehiya Îranê 10 xwepêşanderên kurd li Rojhilatê Kurdistanê hatin şehîd kirin û nêzîkî 50 kesên din jî birîndar bûne.
Îro 22.09.2022yê xwepêşanderan li piraniya bajarên Îran û Rojhilatê Kurdistanê xwepêşandan berdewam kirin û ji ber wê jî di 24 demjimêrên borî de tene li bajarên Şino, Seqiz, Urmiye û Şaabad ên Rojhilatên Kurdistanê 10 xwepêşander hatin kuştin û zêdetir ji 50 xwepêşanderên din jî li bajarên din ên Rojhilatê Kurdistanê yên Sine, Bane, Pawe, Diwandere, Mehabad û hwd… birîndar bûn. Herwaha li piraniya bajarên Îranê jî bi taybet li Tehran, Rak û Tewrêzê xwepêşanderan êrîşî bi dehan banke û saziyên hikûmetê kirin û agir berdanê.
Ji aliyê din ve ji ber weşandina xwepêşandanan û veguhestina deng û weşankirina xwepêşandanan hêzên ewlehiya Îranê gelek rojnamevan jî girtine, ku kar ji bo ragehandinên navxweyî yên Îranê re dikirin.
Herwaha li gel berdewam kirina xwepêşandanan li piraniya bajarên Îran û Rojhilatê Kurdistanê xetên înternetê ji aliyê saziyên ewlehiya Îranê ve hatine birin û cîhên ku înternet lê heye jî pir giran û kêm kar dike û sansorekî zêde li ser heye.
