Çekya dixwaze geştyaran bişîne Duhokê

Duhok ji aliyê hejmara cihên geştyariyê ve parêzgeha herî dewlemend a Herêma Kurdistan û Iraqê ye û 15 hezar cihên razanê ji bo geştyaran li wê parêzgehê hatine dabînkirin.

Heta dawiya meha Mijdarê ya îsal, 2 milyon û 430 hezar geştyar bo seyrangeh û cihên geştyariyê yên parêzgeha Duhokê geşt kirin.

Rêveberê Geştyariya Duhokê Xeyrî Elî di wê baweriyê de ye ku bi temambûna çend projeyên nû yên geştyariyê, geştyarên zêdetir û dibe ku geştyarên Ewropî jî serdana parêzgeha Duhokê bikin.

Xeyrî Elî ji Kurdistan24ê re ragihand, Kabîneya Nehem girîngiyeke mezin bi sektora geştyariyê dide. Sala bê qonaxa duyem a projeya geştyariyê ya Çiyayê Zava dest pê dike û ev jî dê bibe sedema rakişandina geştyarên zêdetir. Gelek welat dixwazin geştyaran bişînin parêzgeha Duhokê û di dema borî de Konsulê Çekyayê serdana Rêveberiya Geştyariya Duhokê kiriye û behsa vê mijarê kirine.

Li gor amarên Rêveberiya Geştyariya Duhokê, îsal 81 cihên nû yên geştyariyê li wê parêzgehê hatine vekirin. Niha li Duhokê nêzîkî 900 cihên geştyariyê û 250 seyrangeh û cihên sirûştî hene.