Ji ber lehiyê rêya Hewlêr û Duhokê bo çûnhatinê hate girtin

Doh li çend navçe û deverên Başûrê Kurdistanê şepêleke barînê dest pê kir û ji ber zêdebûna rêjeya barîna baranê li çend deveran lehî rabû.

Li gorî agahiyan, ji ber rabûna lehiyê û bilindbûna asta ava Çemê Zêya Mezin rêya sereke ya navbera Hewlêr û Duhokê hatiye daxistin.

Herwiha li Çomanê û Hacî Omeranê jî lehî rabû û di encamê de rêya çendîn gundên li sînorê Çomanê bo hatinûçûnê hatin daxistin lê belê piştre bi hewlên tîmên rê û banan rêyên daxistî hatin vekirin.

Li devera Biradost û Deşta Berazgirê jî ji ber lehiyê rêyên hatinûçûnê hatine daxistin.