Alîkarê Serok Barzanî Hêmin Hewramî di hevdîtinekê ligel ajansa “Andulu” de ragihand, Herêma Kurdistanê rijd e li ser wê yekê ku îsal referandûmê bike, hemû hewlên xwe jî dikin bo encamdana vê proseyê.
Her di vê çarçovê de Hêmin Hewramî got: “Encamdana referandûmê mafê rewa ya gelê me ye” û gelê Kurd jî dilniya dikin ku îsal referandûmê tê kirin û bi proseyeke çarenivîsî binav kir.
Di beşeke din de Hewramî amaje bi wê da, encamdana referandûmê di îsal de, biryara serkirdayetiya siyasî ya Kurd û biryara Serokê Herêma Kurdistanê ye.
Her derbarê vê pirsê de, Hewramî daxwaz ji aliyên siyasî yên Herêma Kurdistanê kir ku, hevkar bin û bi hev re vê gavê bavêjin, ji ber ku ev pirsa encamdana referandûm û serxwebûnê pirseke netewî û niştimanî ye.
Hewramî di bersiva gotina “Rewş ne guncaw e bo encamdana referandûmê” de got: “Reng e ji me re bibêjin ku rewşa darayî ya herêmê bo encamdana referandûmê ne bar e û nava mala Kurdî ne yekxistî ye. Reng e bibêjin Herêma Kurdistanê piştî dewletbûnê nikare xwe birêve bibe. Lê pirs ew e, ewên dixwazin referandûm û serxwebûnê bi derengî bikeve, bila baweriyê ji me re çê bike, ka kengî dema serxwebûn û referandûmê ye. Kî dikare me bigihîne wê baweriyê ku niha ne dema vê pirsa neteweyî ye?”
