Berdevkê Wezareta Derve ya Iraqê Ehmed Mehcûb ragihand: “Civata Wezîrên Iraqê bi awayeke nehênî dengana li ser lîsteya 30 kesî ya namzetên balyozxaneyan kiriye û navê 28 kesan hatiye pesendkirin. Di nava lîsteyê de kesên ku beriya niha ne balyoz bûne û dê ji nû ve dest bi vî karî bikin, piştî dengdana li parlamentoyê dê werin destnîşankirin.”
Cîgirê Serokê Komîsyona Peywendiyên Derve ya Parlamentoya Iraqê Mihemed Nûrî Ebd Rebe, di vê derbarê de ragihand: “Em ji ber lîsteya namzetan şok bûn. Hinek ji wan li derveyî pisporiya pîşeyî hatine destnîşankirin û ti peywendiyên wan bi dîlomasiyê ve nîne, li ser bingeha parvekirina hizbî hatine diyarkirin.”
Lê Berdevkê Wezareta Derve ya Iraqê Ehmed Mehcûb dibêje: “Di lîsteyê de kesên xwedan şiyan hatine nivîsandin. Lîste jî li gorî mercên karê dîplomasiyê hatiye amadekirin, ti peywendiya wê bi aliyên hîzbî û mezhebî ve nîne.”
Li gorî gotina Mihemed Nûrî Ebd Rebe, li welatên derve 76 nûner û 38 balyozxaneyên Iraqê hene. Lê li gorî malpera fermî ya Wezareta Derve ya Iraqê, hejmara balyozxaneyan 68 e û 9 balyozên Iraqê jî Kurd in.
Balyozên Kurd ên li Wezareta Derve ya Iraqê ev in:
Bekir Fetah Husên, li Swêdê
Seywan Barzanî, li Holandayê
Bekir Ehmed Caf, li Ukraynayê
Ehmed Ebubekir Bamernî, li Îtalyayê
Ehmed Tehsîn Berwarî, li Çînê
Xazî Tahîr Xalîd Zêbarî, li Yûnanîstanê
Omer Berzencî, li Vatîkanê
Husên Teha Şingalî, li Romanyayê
Şoreş Xalîd, bi pileya balyoz e û alîkarê wezîrê derve ye
