Beriya ku Muharrem Înce ji pêşbirkê vekişe, encamên rapirsiyê bi vê arasteyê bûn ku hilbijartin dê di gera duyemîn de bimîne. Lê niha atmosfereke nû heye û eger heye ku di gera yekem de hilbijartinê yekalî bibe.
Her çend hilbijartinên serokomarî û parlementoyê didomin, lê çav zêdetir li ser hilbijartinên serokomariyê ne. Rapirsîn amaje bi wê dikin ku cudahiya dengan di navbera Erdogan û Kalçdaroglu de, pir nêzîkî hev in. Piştî vekişîna Muharrem Înce, 3 namzed di hilbijartinan de hevrikiyê dikin, li gorî rapirsiyan jî Erdogan an jî Kalçdaroglu yek ji her du namzedan, dê bibe serokomarê Tirkiyê.
NAMZEDÊN HILBIJARTINÊN SEROKOMARIYA TIRKIYÊ
Recep Tayyip Erdogan
- Serokomar û Serokê Giştî yê AKPê Recep Tayyip Erdogan, namzedê tifaqa Cumhur e û cara sêyem e xwe dike namzed.
- Partiyên ku piştgiriyê didin Erdogan ev in: Partiya Dad û Geşepêdanê (AKP), Partiya Tevgera Neteweperest (MHP), Partiya Yekîtiya Mezin (BBP), Partiya Yeniden Refa, Partiya Çep a Demokratîk (DSP) û Partiya Doza Azad (HudaPar).
- Erdogan di hilbijartinên 2014’an de ji sedî 51,47 û di hilbijartinên 2018’an de jî ji sedî 52,59 deng bi dest xistibûn.
- Erdogan di sala 1954an de li Stenbolê jidayik bûye, Akademiya Zanistên Aboriyê ya Stenbolê qedandiye, zewicî ye û 4 zarokên wî hene.
Kemal Kiliçdaroglu
- Namzedê Hevpeymaniya Milet û Serokê Partiya Komarî ya Gel (CHP) ye.
- Partiyên wek Partiya Komarî ya Gel (CHP), IYI Partî, Partiya DEVA, Partiya Pêşerojê, Partiya Saadetê, Partiya Demokrat, Tifaqa Ked û Azadiyê, Partiya Guhertina Tirkiyê (TDP) û Partiya Komunîst a Tirkiyê piştgiriya wî dikin.
- Kemal Kiliçdaroglu di sala 1948an de li Dêrsimê jidayik bûye, fakulteya Zanistên Aborî ya Enqerê qedandiye, zewicî ye û sê zarokên wî hene.
Sînan Ogan
- Parlamenterê berê yê Partiya Tevgera Neteweperest (MHP) û namzetê tifaqa Ata.
- Serok û damezrînerê Enstîtuya Lêkolînê ya Turksam e.
- Di sala 1969'an de li Îderê jidayik bûye, lêkolîner û akademîsyen e, zewicî ye û du zarokên wî hene.
Dengdana ji bo hilbijartinên serokomarî û parlamentoyê îro saet 08.00 dest pê kir û dê heta saet 17.00 berdewam bike.
Di hilbijartinê de ji nav welêt 60 milyon û 697 hezar û 843 dengder wê bikaribin dengê xwe bidin û ji wan 4 milyon û 904 hezar û 672 dengder cara ewil e ku dê dengê xwe bidin.
Li 973 navçeyên 81 bajarên Tirkiye û Bakurê Kurdistanê ji 191 hezarî zêdetir sindoq hatine danîn.
Di çarçoveya Hilbijartina Giştî ya Parlamenteriyê ya Heyama 28emîn de jî 24 partiyên siyasî û ji seranserê Tirkiyê jî 151 namzedên parlamenteriyê yên serbixwe hene.
