Roja 15.09.2024ê, li bajarê Kopenhagin a paytextê Danîmarkayê, bi minasebeta yekemîn salvegera damezrandina Partîya Welatparêzên Kurdistanê (PWK), bi amadekarîya Rêxistina Danîmarkayê ya PWKyê, bi brîfîng û resepsîyonekê yeksalîya PWKyê hate pîroz kirin.
Di destpêka pîrozbahîyê de, endamê Komîteya Birevebir a Navendî ya PWKyê Mîrza Akar bixêrhatina beşdaran kir û paşê di derbarê bername, armanc û sîyaseta PWKyê de, brîfîngek da.
Piştê brîfîngê Mîrza Akar bersiva pirsên beşdaran da.
Nûnerên Hizba Demokrat a Kurdistanê-Îran (HDK-Î), Partîya Pêşverû ya Demokrat a Kurd- Sûrîye (PPDKS), PSK û HAK-PARê beşdarî pîrozbahîya yeksalîya PWKyê bûn û peyamên xwe yên bi xwe pêşkêş kirin.
Herweha rêvebir, endam û alîgirên PWKyê yên li Kopenhaginê û hinek rewşenbîr û sîyasetmedarên Kurd beşdarî pîrozbahîya yeksalîya PWKyê bûn.
Brîfîng bi awayekî berfireh û kêfxweşî derbas bû. Piştê brîfîngê resepsîyoneke bi xwarin, vexwarin, sohbet û wênekêşîyan heta dawîya saeta xwe domand.
Pîrozbahîya yeksalîya PWKê bi kêfxweşî, dilxweşî û memnunîya beşdaran bi van şîarên li jêr bi dawî hat.
Bijî xebat û têkoşîna me ya ji bo mafê çarenivîsa miletê kurd û Kurdistanê!
Yeksalîya Partîya Welatparêzên Kurdistanê (PWK) Pîroz be!
Bijî Partîya Welatparêzên Kurdistanê!
Buroya Ragehandinê ya Partîya Welatparêzên Kurdistanê (PWK)
