Li Amedê ji ber Ala Kurdistanê 5 kes hatin desteserkirin

Di lîstika Amedspor-Bursasporê ya ku şeva borî li Diyarbekirê hat lîstin de bilindkirina Ala Kurdistanê bû rojev.

Hat diyarkirin ku Parêzgariya Amedê û Wezareta Navxwe ya Tirkiyê derbarê kesên eleqedar de pêvajoya hiqûqî û lêpirsîn dane destpêkirin.

Li gorî agahiyên hatine bidestxistin, duh êvarê li Amedê herî kêm 5 kes ji ber bilindkirina Ala Kurdistanê hatine desteserkirin.

Lêpirsîna bi kesên desteserkirî re li Şaxa Rêveberiya Ewlekarî ya Amedê berdewam e.

Duh Yekşembê 25ê Îlona 2022an, di hefteya 6mîn a lîga 2 a futbola Tirkiyê de her du tîmên Amedspor û Bursasporê li bajarê Amedê ku bi hezaran alîgirên tîma Amedsporê têde amade bûbûn, hatin hemberî hev.

Lîstik bi encama 2-0 di berjewendiya Amedsporê de bi dawî hat û wê tîma bajarê Amedê 3 puan bidest xistin.

Di lîstikê de li stadyumê ji aliyê hejmarek kesan ve alên Kurdistanê hatibûn bilindkirin.

Herwiha hin kes jî bi tîşortên wêneyê keça Kurd a 22 salî Jîna Emînî ku di dema desteserkirina ji aliyê polîsên exlaqê yên Îranê de li Tehranê canê xwe ji dest dabû, li stadyumê amade bûbûn.