Konseya Asayîşa Herêma Kurdistanê got, “Êriş ji aliyê rêxistina terorîst a DAIŞê ve hatiye plankirin û êrişkar ferman ji serkirdeyekî DAIŞê wergirtiye.”
Di dema pîrozbahiyên Cejna Ekîtoyê yên li bajarê Dihokê de 1ê Nîsanê êrişek hat kirin û di bûyerê de du kes birîndar bûn.
Di daxuyaniya ku ji aliyê Konseya Asayîşa Herêma Kurdistanê ve hat weşandin de hat gotin:
“Ev êrişeke terorîstî bû û êrişkar ji aliyê DAIŞê ve hatibû şandin.
Êrişkar, ferman ji serkirdeyekî DAIŞê wergirt.”
Konseyê ragihand ku êrişkar “Luay Ebdulrehîm” e û bi nasnavê “Ebû Cuheymanê Baxuzî” tê naskirin.
Êrişkar li xwe mikur hat û bi Erebî got:
“Ez berê li Qamişloyê dijiyam, niha jî li Kampa Domizê dijîm.
Sala 2024an bi rêya sepanên sohbetê min bi DAIŞê re têkilî danî û ez tevlî rêxistinê bûm.”
Êrişkarî her wiha got, “Min dersên şerîet, cîhad û ewlehiyê wergirtin. Ez bi êrişa Xirîstiyanan hatim wazîfedarkirin.”
Cejna Ekîtoyê wekî serê sala nû ya Babîl-Asûrî tê zanîn û her sal 1ê Nîsanê tê pîrozkirin.
Di vê cejnê de festival û çalakiyên cur bi cur tên lidarxistin.
