Wezîrê Derve yê Iraqê Fuad Husên di çarçoveya beşdarbûna civîna salane ya Civata Giştî ya Neteweyên Yekbûyî de ragihand, heta çar salên din Amerîka dê alîkariya hêzên Pêşmerge bike û divê PDK û YNK li hev bikin, da ku roleke girîng di proseya siyasî ya Iraqê de bilîzin.
Fuad Husên li New Yorkê ji Kurdistan24ê re ragihand, rola Herêma Kurdistanê girîng e û dikare roleke mezin di pêkanîna hikûmeta Iraqê de bilîze.
Fuad Husên diyar kir: “Divê PDK û YNK li hev bikin û herdu alî û aliyên din ên Kurdî li Bexdayê li ser siyaseta hikûmeta nû bandora wan hebe.”
Derbarê beşdariya Iraqê di civîna salane ya Neteweyên Yekbûyî de, Wezîrê Derve yê Iraqê got: “Weke dewlet, Iraq ji cîhanê cuda nîne û berjewendiyên wê yên aborî, siyasî û stratejîk hene, hemû ew welatên ku me ew dîtin, tekezî li ser wê yekê dikin ku divê aliyên Iraqî bigihin rêkeftinê û hikûmet were avakirin.”
Herwiha Hûsên eşker kir: “Welatên cîran, Ewrûpa û Amerîka tekezî kirin ku ew destwerdanê nakin di pêkanîna hikûmetê de, ji bo wan girîng e ku ew bi xwe hikûmetê pêk bînin, eger Herêm û Bexda hevkar bin, dikarin hikûmetekê ava bikin.”
Li ser alîkariya Amerîkayê bo Pêşmerge, Wezîrê Derve yê Iraqê got: “Çendîn sal in Amerîka alîkariya Pêşmerge dike û pêwîstiya Amerîkayê bi rizamendiya Iraqê heye û tiştê ku min fêm kir, Serokwezîrê Iraqê jî rizamendî nîşan daye û ji bo çar salên din, ew alîkarî dê berdewam bin.”
