Sirûseqeqma li Başûrê Kurdistanê berdewam e, ji ber barîna berfê rêyên bi dehan gundan hatine girtin û duh bi şev li hinek herêman pileya hewayê ket di bin sifrê de 16ê.
Rêveberê Meteorolojiyê Fazil Îbrahîm ragihand ku li herêma Hecî Omer a Hewlêrê ku sînorê Rojhilatê Kurdistanê ye, pileya hewayê heta di bin sifrê de 16ê daketiye.
Fazil Îbrahîm diyar kir ku ji sala 2005ê li Herêma Kurdistanê û Iraqê cara Yekem e bi ewqasî nizm bûye.
Li çend bajarên Başûrê Kurdistanê di heyama 24 seatên dawiyê de pileya hewayî wiha hatiye pîvan:
Hewlêr: -3
Silêmanî: -6
Duhok: -4
Helebce: -2
Kelar: -2
Helşo: -10
Heci Omeran: -16
Çoman: -13
Soran: -7
Kanî Masî: -13
Akre: -5
Barzan: -7
Amedî: -9
Ji ber serma û barîna berfê dewam hatiye rawestandin
Ji ber daketina pileyên germê û pêla barîna berfê, îro Pêncşemê li Silêmaniyê betlane hat ragihandin.
Nivîsîngeha ragihandina parêzgeha Silêmaniyê ragihand ku îro roja Pêncşemê ji ber daketina pileyên germê û pêla berfê ya ku Silêmanî jî daye ber xwe, îro betlane ye.
Di daxûyaniya ragihandina parêzgeha Silêmaniyê de hat gotin, ev betlaneya ku hatiye ragihandin, hêzên ewlekariyê û fermangehên xizmetgûzariyê nagre nava xwe.
Her wiha Elî Osman, parêzgarê Helebce yê bi wekalet jî ragihand ku ji ber daketina pileyên germê û barîna berfê îro Pêncşemê li tevahiya parêzgeha wan dewam tine ye.
Birêveberê Hewanasî û Erdhejiya Herêma Kurdistanê Fazil Îbrahîm ragihand ku rêjeya barîna berfê li sînorê Başûrê Kurdistanê nêzîkî metreyekê bûye û dê di navaçend rojên bê de pileyên germê ji 2 heya 5 derece dibin sifrê de dakevin.
