Serok Mesûd Barzanî li Hola Saad Ebdullah a Hewlêr a Herêma Kurdistanê bi serpereştiya Zankoya Selahedînê di merasima nasandina 6 pirtûkên di bin navê \'Şoreşên Barzan\' de gotarek pêşkêş kir û got, “Dîroka tekoşîna gelê me ji aliyê dijminan ve hatiye berovajîkirin.”
Îro Şemiyê 18ê Hezîrana 2022an li Hola Saad Ebdullah a Hewlêrê bi amadebûna Serok Mesûd Barzanî, Serokê Herêma Kurdistanê Nêçîrvan Barzanî û Serokwezîrê Herêma Kurdistanê Mesrûr Barzanî 6 pirtûk di bin navê \'Şoreşên Barzan\' de hatin nasandin ku ji aliyê rojnamevan û lêkolîner Behram Weledbegî ve hatine nivîsandin.
Serok Barzanî li ser pirtûkên ku ji aliyê rojnamevan û lêkolîner Behram Welatbegî ve hatiye nivîsandin got, “Ev e yekem car e projeyeke akademiyane ya hemdem li ser xebat û têkoşîna 3 sembolên mezinên tevgera rizgariya Kurdistanê, Şêx Ebdulselam Barzanî, Şêx Ehmed Barzanî û Mele Mistefa Barzanî bi belgenameyên arşîva Îranî û Osmanî tê kirin. Ev karekî pîroz û giranbiha ye û di rojeke dîrokî ya wek 18ê Hezîranê roja ku Barzanî û hevalên wî çemê Arasê derbas kirin tê encamdan.”
Serok Barzanî di merasîma nasandina pirtûkan de got, “Mixabin dîroka tekoşîna gelê me ji aliyê dijminan ve hatiye berovajîkirin û hertim hewl dane vê tekoşîna pîroz weke tekoşîna çend eşîret û partiyan nîşan bidin lê ev belge diselmînin ku têkoşîna gelê me ji bo bidestxistina mafên rewa yên neteweya me bûye. Hêvîdar im zana û lêkolînerên Kurd li wan belgeyan bigerin û dîroka neteweya me binivîsin.”
Serok Barzanî di berdewama axavtina xwe de bal kişande ser Rêbaza Barzanî û anî ziman, “Bi destê Şêx Ebdulselam Barzanî yê şehîd û Şêx Ehmed Barzanî li ser bingeha Xwedaperestiyê û mirovatiyê Rêbaza Barzanî hate avakirin. Wan rêyek nîşanî me dan ku heta em bijîn em ê pê serbilind bin.”
Behram Weledbegî di bin navê Şoreşên Barzan de pirtûkeke 6 cildî ya ku zêdetir ji 2300 belgeyên neçapkirî yên arşîva Navenda Belgeyên Stenbolê, Navenda Belgeyên Dîplomasî ya Wezareta Derve ya Îranê, Navenda Belgeyên Neteweyî ya Îranê û belgeyên ku di çapemenî û kovarên Îranê de hatine weşandin, berhev kiriye.
