Barzanî û nûnerê Trump hevdîtinek pêk anîn

Serokwezîrê Herêma Kurdistanê Nêçîrvan Barzanî pêşwaziya Nûnerê Taybet ê Serokê Amerîkayê yê şerê dijî DAIŞê Bertt McGurk û Alîkarê Cîgirê Wezîrê Derve yê Amerîkayê Endriyo Pîk û Balyozê Amerîkayê yê li Iraqê Douglas Silliman û heyeta li gel wan kir.

Herwiha di civînê de Cîgirê Serokwezîr Qubad Talebanî jî amade bû, heyeta mêvan kêfxweşiya xwe ji ber kêmbûna aloziyan û dîdar û civînên erênî yên navbera Hewlêr û Bexdayê nîşan dan û hêviya xwe anîn ziman ku civîn berdewam bibin. Li gor daxuyaniya malpera Hikûmeta Herêma Kurdistanê, heyeta amerîkî piştgiriya xwe ji bo pêngav û gotûbêjên cidî yên navbera Hewlêr û Bexdayê nîşan daye û tekezî li ser pêwendiyên navbera Amerîka û Herêma Kurdistanê û berdewambûna alîkarî û piştgiriya Herêma Kurdistanê kirine.

Barzanî jî tevî spasiya rola hevpeymanan ku salên derbasbûyî bi serokatiya Amerîkayê di şerê li dijî DAIŞê de roleke mezin lîstibû diyar kiriye ku bi pêwîstî dibîne ku hevpeymanan ji bo çareserkirina pirsgirêkan, handana Hewlêr û Bexdayê bidomînin.