Sekreteriya Giştî ya ENKSê îro di daxuyaniyekê de ragihand, “Hevdem ligel gefên Tirkiyê yên ji bo dagîrkirina navçeyên nû, (PYD) hema hema her roj xwepêşandanan dike û wêne û PKKê bilind dike û dirûşmên xiyanetiyê li dijî partî û hêzên Kurdî davêje.”
ENKS di daxuyaniya xwe de bang li civaka navdewletî, bi taybetî Amerîka û Rûsyayê kir ku biryar û rêkeftinên navdewletî yên derbarê Sûriyê de cîbicî bikin. Daxwaz ji van aliyan kir ku kar ji bo nehîştina gefên Tirkiyê û destwerdana wê ya leşkerî di herêmê de bikin, ji ber ku dê aloziyên zêdetir ji bo kirîza Sûriyê çêbike û êş û azarên Sûriyan û bi taybetî xelkê vê herêmê zêdetir bike.
ENKS di beşeke din a daxuyaniya xwe de got: “Rêveberiya PYDê bi kiryarên xwe yên tirsnak yên li dijî welatiyan berdewam e û her kesê ku li dijî îdyolojiya wê be, çi kes û çi hêzên siyasî be ku di serî de ENKSê, dike armanc.”
ENKS dibêje: “Êdî ne veşartî ye ku desthilatdariya defakto ya PYDê bi xistina hemû hêz û karînan di destê xwe de, nekariye çareseriyên pêwîst ji pirsgirêkên herî hêsan ên jiyanê re bibîne.”
ENKS amaje siyaset, kiryar û binpêkirinên Rêveberiya Xweser kir û diyar kir ku di van şert û mercên dijwar ên jiyanê de, ên wekî nebûna av, elektirîk, giranbûna nirxê sotemeniyê, ferzkirina bac li ser welatiyan û her wiha binpêkirinên wek revandina zarokan û leşkerkirina wan di kampan de, bandoreke mezin li ser bêaramiyê herêmê kiriye.
