Fermandarê Giştî yê HSDyê Mazlûm Ebdî li ser hesabê xwe yê medyaya civakî Xê derbarê rewşa Dêrezor, Minbic û Til Temirê daxuyanî da.
Bi gotina Mazlûm Ebdî rewş ber bi aramiyê ve diçe.
Mazlûm Ebdî li ser hesabê xwe yê Xê wiha nivisiye:
“Bi hevkarî û piştgiriya xelkê me yê Dêrezorê, hêzên me dê bi operasyona Xurtkirina Ewlehiyê, xebatên pêkanîna aramiya li herêmê û peydakirina ewlehiyê, berdewam bikin.”
Mazlûm Ebdî herwiha got, “Rewş bi saya civaka xwecihî, êşirên herêmê û HSDyê, ber bi aramiyê û parastina aştiya navneteweyî ve diçe.
Lê dewleta Tirk a dagirker bi armanca têkbirina aramiya li herêmê û tunekirina îradeya gelê me, êrişî Til Temir û Minbicê dike.”
Çi rû da?
Hêzên Sûriyeya Demokratîk (HSD) bi piştîvaniya Hêzên Hevpeymaniya Navdewletî 27ê Tebaxê li parêzgeha Dêrezorê operasyoneke berfireh a bi navê “Xurtkirina Ewlehiyê” dabû destpêkirin.
Di operasyonên HSDyê de serokê Encûmena Leşkerî ya Dêrezorê Ehmed el-Xebîl Ebû Xewle û çend kesên nêzîkî wî hatibûn desteserkirin.
Piştî desteserkirina serokê Encûmena Leşkerî ya Dêrezorê Ehmed el-Xebîl Ebû Xewle, li herêmê alozî gur bûn.
Li ser vê yekê, alîgirên Ebû Xewle êrişî xalên HSDyê û Hêzên Ewlekariya Hundirîn kir.
Herwiha çekdarên din jî êrişî binkeya HSDyê ya li bajarokê El Besîrayê yê li gundewarê rojhilatê Dêrezorê kir.
Rêxistina Çavdêriya Mafên Mirovan a Sûriyeyê (SOHR) ragihandiye ku di şer û pevçûnan de heta niha zêdeyî 52 kesan hatine kuştin.
