Kongireya Diyalogê ya Sûriyeyî roja 25ê Sibatê li Şamê bêyî beşdariya aliyên siyasî yên Kurdî lidar ket. Li gorî daxuyaniya dawiya kongreyê jî, “Beşdarên kongreyê daxwaza bilezkirina pêngavên amadekirina destûrê nû yê Sûriyeyê kirin û tekez kirin ku, divê ax û gelên Sûriyeyê hevgirtî bimînin.”
Kongireya Diyalogê ya Sûriyeyî herwesa tekezî li ser wê yekê kir ku divê hemû çek di destê dewletê de be û hemû komên çekdar ên Sûriyeyê wekî komên “deryasayî” tên hejmartin.
MSDê der barê Kongreya Diyaloga Niştîmanî ya ku li Şamê hatibû lidarxistin de, daxuyaniyek da û tê de ragihand, “Berê jî MSD'ê bi daxuyaniyekê rêbaza hilbijartina komîteya amadekar a kongreyê, hişmendiya komîteyê û daxuyaniyên wê red kiribû. Lidarxistina kongreyê jî berdewama rêbaza paşguhkirin û dûrxistinê ye ya ku bi deh salan li qada siyasî ya Sûriyeyê serwer bû.”
MSD dibêje: “Tunebûna nûnertiya adilane ya hemû pêkhateyên Sûriyeyê yên neteweyî, civakî û siyasî û lidarxistina lezgîn a kongreyê bêyî ku bingehên zelal jê re werin danîn û garantiyên rastîn hebin, diyar dike ku di vê kongreyê de tu dozên çarenûsî û siberoja Sûriyeyê bi cidî nehatin destgirtin û tenê tedbîreke şeklî bû. Her wiha kongre tu çareseriyên guncaw û hevkariyeke neteweyî di avakirina Sûriyeyê de pêk nayne.”
Di daxuyaniyê de hat gotin jî: “Xwespartina li rêbazên kevin ên binkeftî bi rêya keysbazkirina biryara siyasî û dûrxistina pêkhate û hêzên niştimanî yên aktîv ji hêla desthilata Şamê ve, wê bi xwe re parçebûnê kûrtir bike û firseta serketina pêvajoya veguhêz têk bibe. Diviyabû desthilata Şamê ji rêbazên rejîma desthilat bi dûr ket, diyalogeke cidî, rastîn û giştî ji bo qonaxa veguhêz li dar bixista, da ku hêviyên gelê Sûriyeyê pêk bihata.”
