PDK-S hawara xelkê Efrînê digihîne civaka navdewletî

Polîtburoya Partiya demokrata Kurdistana Sûriyê (PDK-S) di raporekê de ragihand, ku Encûmena Niştimaniya Kurd li Sûriyê (ENKS) di kar û xebatên xwe de berdewam e heta ku sîstema rêveberiyê li Sûriyê bibe federalî û têde mafê gelê Kurd, û mafê tevahiya pêkhateyên din li Sûriyê li gor peymanên navdewletî bihêne parastin.

PDK-Sê herwiha di raporta xwe de rexne li siyaseta Partiya yekîtiya Demokratîk (PYD) li hember aliyên din û bi taybet ENKSê digire û dibêje, heta niha jî PYD siyaseta bêdengkirinê li dijî berpirs û endamên ENKSê dimeşîne û heta niha jî endamên wan tên girtin.

Polîtburoya PDK-Sê da xuyakirin, ku ji bo rêgirtina li ber wê zulm û zordariya ku li Efrînê tê kirin, divê dengê nerazîbûnê bigihê civaka navdewletî û saziyên mafê mirovan, daku ew jî xelkê deverê ji vê sitemkariya hêzên tarî biparêzin.

Herwiha têkildarî rewşa Efrînê de, ku niha di bin kontrola hêzên Tirkiyê û çekdarên opozisyona Sûriyê de ye, PDK-Sê ragihandiye, kurewşa Efrînê pir xerab e û heta niha rê li pêşiya vegera xelkê Efrînê bo ser cih û warê xwe tê giritin û li nav Efrînê bi xwe jî xelk têne girtin û êşkencekirin.

PDK-Sê li ser wê yekê destnîşan kiriye, ku pêwîst e civaka navdewletî li ser rewşa Efrînê û binpêkirinên di derheqê xelkê wê de helwêst nîşasn bide.