MSD di daxuyaniya xwe de diyar kiriye: “Li ser daxwaza hikûmeta Sûriyê, di navbera şandeke ji Meclisa Sûriyeya Demokratîk û hikûmeta Sûriyê li Şamê di dîroka 26.07.2018an de civînek pêk hat. Armanc ji vê hevdîtinê, danîna bingehên ji bo destpêkirina diyalogên berfireh e, daku hemû pirsgirêk û aloziya Sûriyê di hemû astan de werin çareserkirin.”
Di daxuyaniya Meclisa Sûriyeya Demokratîk (MSD) de hatiye eşkerekirin: “Beriya van hevdîtinan, li bajarê Tebqayê di navbera komîteyên biçûk ên herdu aliyan de hevdîtin çêbûn û di wan hevdîtinan de mijarên xizmetguzarî hatin nîqaşkirin.”
MSDê diyar dike: “Di encama civînê de, biryarên bi vî awayî hatin dayîn ku komîte li ser hemû astan werin avakirin, da ku diyalog û danûstandin werin pêşxistin û bigihîjin bidawîkirina tundî û şerê ku gel û civaka Sûriyê kire metirsiyê, ji aliyekî din ve jî nexşerêyek were dayîn ku rê ber bi Sûriyeke demokratîk û nenavendî were vekirin.ʺ
Roja 26ê Tîrmehê li ser vexwendina hikûmeta Sûriyê, bi serokatiya Hevseroka Meclisa Sûriyeya Demokratîk (MSD) Îlham Ehmed û Serokê Giştî yê Partiya Pêşeroja Sûriyê Îbrahîm El Qeftan, şandek çûbû Şamê.
