Li gor medyaya Tirkiyê, artêşa Tirkiyê amadekariya destpêkirina operasyoneke nû li Sûriyê dike, ku dixwaze ji aliyê rojava ji gundê Dêr Belût ya Efrîn û keleha Samanê û ta gundên Zofiyan û Diwêr li rojhilat bi rûbera 170 K.M kontrol bike.
Li gor rojnameya “Yeni Şefek” a Tirkî, di wê operasyonê de dê nêzîkî 20 hezar leşkerên Tirk ligel 15 hezar çekdarên opozîsyonê beşdar bin, ku armanca wan kontrolkirina 4 hezar û 500 K.M çargoşe li wê navçeyê ye.
Herweha li gor raporên medyaya Tirkiyê, Rûsyê niha hewl dide Yekîneyên Parastina Gel (YPG) ji Efrîn û Til Rifetê derxe, da ku wan radestî hikumeta Sûriyê bike.
Li Efrîn û Til Rifet du navendên Rûsî hene û berî niha li bajarokê Til Rifet ji dêvla ala YPGê, ala Rûsî hatibû bilindkirin.
Ji aliyekî din ve, rojnameya “Karar” a Tirkî pêşbîn dike, Tirkiyê operasyona li dijî Efrînê bi awayekî cuda ji ya Mertala Ferêt bi rê ve bibe, ku armanca Tirkiyê li Efrînê dê hin xalên diyarkirî kontrol bike û ne tevahiya herêmê.
Ji bo wê armancê, ji demekê ve artêşa Tirkiyê hêzên xwe li ser sînor li nêzîkî Efrînê kom dike û firokeyên bê firokvan jî li esmanê Efrînê digerîne, ji bilî ku hin caran jî gundên Efrînê topbaran dike.
