Endamê Nûneriya ENKSê li Naşûrê Kurdistanê, Reşad Silêman ji Tora Medyayî ya Rûdawê re ragihand ku şandeke ENKSê dawiya vê heftiyê dê seredana Moskowê bike.
Di dema beşdarbûna xwe de li bernameya Çavê Sêyem a radyoya Rûdawê de, Reşad Silêman aşkere kir ku ew şanda encûmenê dê roja Pêncşemê biçe Rûsyayê û li gel berpirsên Rûsî hejmarek civîn û hevdîtinan pêk bîne.
Li gor wî rayedarê ENKSê, şand dê pêşhateyên herî dawî li Sûriyê û Rojavayê Kurdistanê ligel berpirsên Rûsî gotûbêj bike.
Reşad Silêman amaje bi wê yekê neda ku dê kîjan rayedarên ENKSê di wê şandê de cih bigirin û herwiha diyar jî nekir, ku ew serdan dê çend rojan bidome.
Pêştir jî çendîn caranên şandên Encûmena Niştimanî ya Kurd li Sûriyê (ENKS) serdana Rûsyayê kirine û bi berpirsên Wezareta Derve ya Rûsyayê û Nûnerê Serokê Rûsyayê yê bo Karûbarên Sûriyê hevdîtin pêk anîne.
Serdana wê şanda ENKSê bo Rûsyayê di demekê de ye, ku Rojavayê Kurdistanê di qonaxeke hesas re derbas dibe û di jêr êrîşa Tirkiyê û komên çekdar de ye. Herwiha bo yekemîn car ji destpêka aloziyên Sûriyê ve, hêzên artêşa Sûriyê û hêzên Rûsyayê li hin navçeyên Rojavayê Kurdistanê bicih bûne.
PARVE BIKE LI SER
