Serok Mesûd Barzanî îro şemiyê 13ê Tîrmeha 2019an bi peyamekê ragihand: “Niha û berê jî raya me wiha bûye ku em li ser Kurdîstanîbûna nasnameya Kerkûkê paşvekêşiyê nakin û divê Kerkûk bibe mînaka pêkvejiyana neteweyî û olî û hemû pêkhat bikarin bi aştî û birayetî û tebayî li Kerkûkê li gel hevdû bijîn.”
Peyama Serok Barzanî wiha ye:
Bi navê Xwedayê mezin û dilovan
Kêşeya Kerkûkê tenê giriftê siyasî ya di navbera du partî yan gengeşeya siyasî ya di navbera çend aliyan nîne. Di rastiyê de kêşeya Kerkûkê babeteke dîrokî û siyasî û kevn e û di heman demî de jî fireh rehend û mezin e.
Bi sedema wê rewşa neasayî ya li ser Kerkûkê hatiye û ji ber pêwîstiya asayîkirina rewşa emnî û îdarî ya bajar û xizmetkirina xelkê Kerkûkê û herwiha çareserkirina kêşeyan bi giştî, em li gel wê yekê ne ku rêkeftin û hevreyî ya aliyên Kurdan, hengavekî girîng e lê belê li gel ewe jî pêwîst e kêşeyên Kerkûkê bi parêzgar ve jî di destpêkê li navbera Hewlêr û Bexda bê yekalîkirin û bê çareserkirin. Her encamek jî ku hebê divê cihê rizamendiya hemû pêkhatên Kerkûkê bê.
Niha rewşeke erênî li peywendiyên di navbera Hewlêr û Bexdayê de hatiye holê û eve jî derfetekî gelek baş e ku bi sûdwergirtina wê rewşa erênî giriftên emnî û îdariyên Kerkûkê jî çareser bibe û di çarçoveya destûrê de Kerkûk vegere ser rewşa xwe ya asayî. Ji ber ku ew rewşa niha li Kerkûkê heye nabe berdewam be.
Niha û berê jî raya me wiha bûye ku em li ser Kurdîstanîbûna nasnameya Kerkûkê paşvekêşiyê nakin û divê Kerkûk bibe mînaka pêkvejiyana neteweyî û olî û hemû pêkhat bikarin bi aştî û birayetî û tebayî li Kerkûkê li gel hevdû bijîn.
Mesûd Barzanî
13.07.2019
