Encûmena Asayîşa Neteweyî ya Tirkiyê dicive

Civîn Encûmena Asayîşa Neteweyî ya Tirkiyê îro Pêncşemê 1ê Kanûna 2022ê demjimêr 15:300 deqe piştî nîvro bi serokatiya Serokkomarê Tirkiyê Recep Tayyip Erdogan destpê dike.

Tê çaverêkirin ku di civîna dawî ya îsal a Encûmena Asayîşa Neteweyî ya Tirkiyê de, “rûbirûbûna terorê û egera pêkanîna êrîşeke bejahî bo ser Rojavayê Kurdistanê, operasyona Pence-Kilîd li Başûrê Kurdistanê û çendîn mijarên stratejîk taybet bi asayîşa wî welatî bên gotûbêjkirin.”

Êrîşa esmanî ya Tirkiyê bo ser Rojavayê Kurdistanê û navçeyên din ên jêr desthilata HSDê roja 20ê Mijdara 2022ê destpê kir. Serokkomarê Tirkiyê roja Duşembê 21ê Mijdarê ragihand ku ne merc e operasyon tenê esmanî be.

Tirkiye bi îddîaya parastina asayîşa sînorên xwe ji terorê wan êrîşan pêk tîne û dibêje, pêdivî bi mohleta ti welatekî din nîne û bo parastina sînorên xwe li ser avêtina pêngavên yekalîker berdewam dibin.