Jêderekî fermî ji Fermandehiya Giştî ya Hêzên Çekdar ên Urdinê ragihand, hêzên wan duhî nîvro, li eniyeke bakur hewldaneke qaçaxçîtiya madeyên hişbir a bi riya dronekê têk bir ku ji nava Sûriyê ber bi xaka Urdinê ve dihat.
Wî jêderî amaje bi wê yekê jî kir, bi çavdêrî û şopandinê, dron hat kontrolkirin û xistin xwarê û hat dîtin ku madeya hişbir (Krîstal) tê de ye, tiştên ku hatine desteserkirin ji bo dezgehên şareza hatine veguhestin.
Artêşa Urdinê gelek caran radigihîne, hêzên wan proseyên qaçaxçîtiya çek û madeyên hişbir ên ji Sûriyê ber bi wî welatî ve tê, têk birine.
Urdin piştrast dike ku ji sedî 85 ê madeyên hişbir ên hatine desteserkirin, ji bo derbaskirina wan bi qaçaxî bo Urdin, Siûdî û welatên Kendavê ne.
Zêdebûna hewildanên qaçaxçîtiyê ji sala borî ve, hîşt ku Urdin rêkarên artêşê yên li ser sînor biguherîne û desthilatê bide artêşê ku hêzek mezin bikar bîne.
Wezîrê Derve yê Urdinê Eymen Sefedî jî di meha Gulana borî ragihand, eger Sûriye sozên xwe bi cih neke û nikaribe rê li ber derbaskirina madeyên hişbir ber bi Urdin, welatên Kendavê û cîhanê ve rawestîne, dê dest bi operasyoneke leşkerî li hundirê Sûriyê bike.
