Jîna Emînî roja 13ê Cotmeha 2022ê li Tehranê ji aliyê polîsên exlaqî ve hat desteserkirin, li bingeha polîs tendirustiya wê têk çû û piştî 3 rojan di 16ê Cotmehê de li nexweşxaneyeke Tehranê canê xwe ji dest da. Piştî canjidestdana Jîna Emînî, li Îran û Rojhilatê Kurdistanê nerazîbûn û xwepêşandanan destpê kir.
Li Rojhilatê Kurdistanê û Îranê çalakî û xwepêşandanên ji bo protestokirina kuştina keça Kurd Jîna Emînî di roja 19an de berdewam in. Li gor rapora Rêxistina Hengaw, li Rojhilatê Kurdistanê heta niha 23 xwepêşander hatine kuştin û hezar û 138 xwepêşander jî birîndar bûne, herwiha zêdeyî 2 hezar kes jî hatine desteserkirin.
Li çar parçeyên Kurdistanê û welatên cuda jî piştgirî û çalakiyên bo xwepêşandanên li Rojhilatê Kurdistanê û Îranê berdewam in.
Di nav de Xecê, Jan Axîn, Rewşan, Xalid Tarî, Berfin Aktay, Mucahit Goker, Berfin Zenderlioğlu, Brader Mûsikî, Gulbahar Kavcu, Agit Işık, Sakîna Teyna û Gökçe Selim bi tevahî 12 hunermendên Kurd ên Bakurê Kurdistanê, bi armanca piştgiriya xwepêşandanên li Rojhilatê Kurdistan û Îranê vîdeoyek bi Kurdî bilav kirin û peyamên hevkariyê bo gelê Rojhilatê Kurdistanê ragihandin.
