Şanda Parlementoya Kurdistanê serdana Efrînê dike

Şêwirmendê Ragihandina Serokatiya Parlementoya Kurdistanê Tariq Cewher ji Rûdawê re ragihand ku roja şemiyê (10-02-2018) bi mebesta ji nêz ve agahdarbûna ji rewşa Efrînê, şandeke Parlementoya Kurdistanê dê serdana Rojavayê Kurdistanê bike.

Tariq Cewher diyar kir: “Şanda parlementoyê 5 kes in û ji fraksiyonên Partiya Demokrat a Kurdistanê (PDK), Yekîtiya Niştimaniya Kurdistanê (YNK), Tevgera Goran, Partiya Komunîst a Kurdistanê û Yekgirtûya Îslamî ya Kurdistanê pêk tê û Elî Halo, Ebas Fetah, Şêrko Heme Emîn, Ebû Karwan û Suhrab Mîkaîl dê weke nûnerên fraksiyonan û Parlementoya Kurdistanê serdana Efrînê bikin.”

Cewher herwiha eşkere kir ku şanda parlementoyê dê alîkariyên derman û kelûpelên pizîşkî jî bi xwe re bibin Efrînê û ew alîkarî ji aliyê Wezareta Tendirustiyê ya Herêma Kurdistanê ve hatiye dabînkirin.

Hêjayî gotinê ye ku di 30ê Çileya 2018an de Parlementoya Kurdistanê rûniştinek li ser operasyona Tirkiyê ya ser Efrînê pêk anî û êrîşên Tirkiyê şermezar kir û bang li civaka navdewletî û Neteweyên Yekbûyî kir ku bi awayekî bilez ji bo êrîşên nerewa yên Tirkiyê yên ser herêma Efrînê bidin rawestandin helwêstek nîşan bidin.