Daxwaz û hêvîyên me ew e ku ev şer dewam neke, berfirehtir nebe û rê li xeterîyên
mezintir veneke.
Gava ku Birêz Serok Mesud Barzanî digot ‘’Şerê di nav Kurdan de heram e, emê ji
îro pê ve rê nedin şerên bi vî rengî’’; ev gotin encama tecrube, êş, zanîn û
dûrbînîyeke bi hest û bîr bawerîyeke netewî, niştimanî ve hatîye hûnandin bû.
Em di wê bawerîyê de ne ku daxuyanî û banga Birêz Serok Mesud Barzanî ya ku
roja 02.11.2020ê hatîye belav kirin jî, bangeke ku her li ser esasê vê hişmendî û
hesasîyeta netewî û welatperwerîyê hatîye ava kirin.
Banga Birêz Serok Mesud Barzanî ne banga şerî ye; bileqisê wê bangeke ku şansê
dide rêlibergirtina şerê di nav Kurdan de.
Aşkere ye ku şerê di nav Kurdan de, dê Kurdên Başûr û Bakur ji hevdu sar bikin, dê
birînên kûr di dilê Kurdan de veke, dê zerareke mezin bide destkeftinên federe yên li
Başûrê Kurdistanê, dê zerareke mezin bigihîne pêvajoya lihevhatina di nav ENKS û
PYNKyê de û dê zerarê bide doza azadîya gelê me ya li Rojhilatê Kurdistanê.
Tecrubeyên gelê me yên dîrokî û yên van demên dawî bi zelalî îspat kirîye ku, heqî
û neheqî li alîyekî, sebebê wê çi dibe bila bibe, şerê di nav Kurdan de tu feyde ji
Kurdan re neanîye; yê zerar dîtîye her Kurd bi xwe bûne, yên jê feyde wergirtine jî
xêrnexwaz û dijminên miletê Kurd bûne.
Bi van hest û bîr û bawerîyan, em bangî rêvebirîya PKKyê dikin ku , piştgirîya banga
Birêz Serok Mesûd Barzanî bikin û demildest bi dîyaloga li gel Rêvebirîya Dewleta
Federe ya Herêma Kurdistanê re gavên pêwîst bavêjin; rêzê li hebûn,îrade, serwerî ,
meşrûîyet û biryarên Parlamento, Hikûmet û Serokatîya Herêma Kurdistanê bigirin.
Em bangî hemû partî, rêxistin û dezgah û kesayetên her çar perçeyên Kurdistanê
dikin da ku em bi yek helwestê rê li ber nexweşî, tûnd û tûjî, şer û birînên nû yên di
nava Kurdan de bigirin. Ji bo hemû pirsgirêk bi rêyên dîyalogê bêne çareser kirin divê
em helwesteke yekgirtî bigirin.
04.11.2020
Buroya Çapemenî û Ragehandinê ya PAKê
