Xebata Kurdan di sed salên derbasbûyî de ev rastî ji bo hemû aliyan derxistiye holê ku bêyî aştiya
navxweyî û yekrêziya Kurdan gelê Kurdistanê nikare bigihîje armancên xwe. Her wisa nikare sûdê
ji wan derfetan bistîne ku li Rojhilata Navîn peyda bûne. Ne tenê ew, belkî nebûna aştiya navxweyî
dikare destkeftiyên heyî jî bixe nava metirsiyan.
Ligel ku di vî warî de ji aliyê kes û saziyên sîvîl ên Kurdan ve bi sedan, bi hezaran daxuyanî hatine
dayîn û bertek hatine nîşandan jî, tirsa me ew e ku careke din bi teşwîqa dijminên Kurdan şerê
navxweyî ango şerê xwekujiyê dest pê bike. Gelê Kurd ji bo hebûn û azadiya xwe di hemû waran
de gelek berdêl dane, nabe ku evqas bêrêzî û terkexemî li hember neteweya Kurd bê kirin.
Ji aliyê din ve em dibînin ku hinek beşên ji çapemeniya Kurdan ji ezmûn û şerên navxweyî yên berê
qet aqil negirtine û bi weşaneke alîgir a ku agirê şerxwaziyê geş dike doza neteweyî ya gelê Kurd bi
paş dixin. Divê çapemeniya Kurdan bi awayekî hestiyar û bi berpirsyarî li gel şert û mercên heyî
yên li Kurdistanê tevbigere û bi tu awayî nebe sedema geşkirina tevliheviyên di navbera partî û
pêkhateyên siyasî-civakî yên Kurdistanî de.
Ji bo belavkirina bîr û ramanên aştîxwaziyê û çanda hevqebûlkirina di nava civakê de barekî girîng
dikeve ser milê rewşenbîr, çapemenî, rayedar û rêvebiran. Bi çi awayî dibe bila bibe, bi berpirsiyarî
û hestiyariyeke welatparêz divê rêyên diyalogê bên dîtin û rê li pêşiya birakujiyê ango xwekujiyê
were girtin. Divê hemû kesên ku xwe welatparêz dibînin li hemberî vê rewşê dengê xwe bilind
bikin, qet rê nedin vê malxerabûnê û di hemû şert û mercan de mafê gelê xwe biparêzin.
Em wek Navenda PENa Kurd, ji hemû aliyên hêzê Kurdan daxwaz dikin ku nekevin dehfika
dijminên gelê Kurd û li gor berjewendiyên neteweya xwe gava bavêjin. Gerek bê zanîn ku heke
şerekî navxweyî çêbibe dê tu aliyekî mafdar ê vî şerî tunebe û raya giştî dê hemû aliyan berpirsiyar
bibîne û tawanbar bike.
Komîteya Birêvebir a Giştî
Navenda PENa Kurd
05.11.2020
