11 Hezîranê dê li Rojavayê Kurdistanê û navçeyên Bakur Rojhilatê Sûriyeyê yên di bin kontrola Rêveberiya Xweser de hilbijartinên şaredariyan bihata lidarxistin.
Lê ew hilbijartin hat bipaşxistin.
Hevseroka Daîreya Têkiliyên Derve ya Rêveberiya Xweser Îlham Ehmedê ragihand ku ji ber daxwazeke milî û sedemên ewlehiyê hilbijartin hatin bipaşxistin.
Îlham Ehmedê herwiha red kir ku pirsa bipaşxistina hilbijartinan girêdayî guşarên Tirkiyeyê be.
Bi gotina Îlham Ehmedê tevî di biryara navdewletî ya 2254an de behsa wan hilbijartinan hatiye kirin.
Hilbijartinên Rojavayê Kurdistanê
Li gorî zanyariyên Komîsyona Bilind a Hilbijartinan a Rêveberiya Xweser, hilbijartin dê li 7 kanton û herêmên Rêveberiya Xweser ên wekî Şehba-Efrîn, Cizîr, Minbic, Ferat, Tebqa, Reqa, Dêrezorê bên lidarxistin.
Di hilbijartinan de dê ji bo 121 navendan hevserokên şaredariyan û endamên meclîsên şaredariyan werin hilbijartin.
Li Rêveberiya Xweser heta niha 2 caran hilbijartin hatin lidarxistin.
Komîsyona Bilind a Hilbijartinan biryar dabû ku 30ê Gulanê hilbijartin werin lidarxistin lê paşê hilbijartin taloqî 11ê Hezîranê kiribûn.
Li gorî biryara nû, hilbijartin dê Tebaxa 2024an werin kirin.
Li Rêveberiya Xweser a Rojavayê Kurdistanê mafê 3 milyon kesan heye beşdarî dengdanê bibin.
Li aliyê din, ew penaberên ku zêdetirî 5 salan li Rêveberiya Xweser niştecih bûne jî dikarin beşdarî hilbijartinan bibin.
