Wekîlê Wezîrê Berevaniya Amerîkayê Patrick Shanahan bi nameyekê ji hevpostê xwe yê Tirkiyê Hulusî Akar re dide zanîn, perwerdekirina pîlotên Tirkiyê bo bikaranîna firokeyên F-35 hatiye rawestandin.
Di nameyê de pêvajoya derxistina Tirkiyê ji bernameya firokeyên F-35 hatiye aşkerekirin û gavên ku dê li dijî Tirkiyê werin avêtin, hatine nivîsandin.
Biryar bû di meha Hezîranê de 20 û di meha Tirmehê de jî 14 pîlotên Tirkiyê biçin Amerîkayê û ji bo bikaranîna firokeyên F35 perwerde bibin. Lê Patrick Şanahan ji Hulusî Akar re bi zelalî dibêje: Êdî pîlotên Tirkiyê nayin perwerdekirin. Divê pîlotên Tirkiyê yên li Amerîkayê jî heta 31ê Tîrmehê vegerin welatê xwe.
Pentagon herwiha bijartinekê datîne pêşiya Enqerê û dibêje, ji bo destberdana kirîna S-400 dema Tirkiyê hê heye. Lê heger Tirkiye ji biryara xwe venegere, ev yek dê zirarê bide pêwendiyên wê yên bi NATOyê û dê jim aliyê aborî ve jî were cezakirin.
Ligel van gefan, Enqere ji gotina xwe nayê xwar. Serokomarê Tirkiyê Recep Tayîp Erdogan berî niha çend rojan bi zelalî gotibû: Ew ji kirîna S-400 venagerin.
Duh jî Serokê Pîşesaziya Berevaniya Rêsyayê Sergey Çemezov jî dabû zanîn, ewê di nava 2 mehan de mûşekên S-400 radestî Tirkiyê bikin.
