Mîrê Kurdên Êzidî Mîr Hazim Tehsîn bi serdanekê li Amerîkayê ye û biryar e ligel revenda Kurdên Êzidî û rayedarên Amerîkî bicive û derbarê rewşa Êzidiyên nişteciyên kampan û komkujiya Êzidiyan de gotûbêj bikin.
Îro Sêşemê 15ê Tebaxa 2023an, Mîrê Kurdên Êzidî Mîr Hazim Tehsîn gihişte bajarê Detroit ê eyaleta Michingan a Amerîkayê û biryar e ligel revenda Kurdên Êzidî û revenda Kildaniyên Iraqî bicive.
Her di vê serdana xwe de biryar e di rojên bê de serdana eyaleta Nebraska bike, ku mezintirîn revenda Kurdên Êzidî li wir niştecî ne, herwiha li Washingtonê ligel rayedarên Amerîkayê li ser rewşa Êzidiyên nişteciyên kampan, komkujiya Êzidiyan, revandina keç û jinên Êzidî biaxivin, ku piştî salên 2014 heta 2017an DAIŞê bi hezaran keç û jinên Êzidî revandin û çarenûsa bi hezaran ji wan, hîn jî nayê zanîn.
Serokê Dezgeha Xêrxwaziya Barzanî Mûsa Ehmed ku niha bi serdanekê li Amerîkayê ye, ji Kurdistan24ê re eşkere kiribû, heta niha zêdetirî 300 hezar koçberên Êzidî li Herêma Kurdistanê bicih bûne û di kampan de ne.
Roja 3ê Tebaxa 2023an, Wezareta Derve ya Amerîkayê di salvegera komkujiya Êzidiyan de piştgiriya Amerîkayê ji bo kesûkarên qurbaniyên Êzidî dubare kiribû û ragihandibû, ew berdewam dibin di guvaşên xwe de ji bo pêkanîna dadperweriyê.
