Parlamenterê AK Partiyê yê Nigdeyê Mustafa Açikgoz, 13ê Çileya 2023an di civîna komeleyeke nijadperestên Tirk a ser bi MHPê li bajarê Neussê yê Almanyayê de gef li endamên Partiya Karkerên Kurdistanê (PKK) û endamên Cemaeta Gulen ên li Almanyayê xwarin û got: “Çawa ku me li Tirkiyê mafê jiyanê neda wan, em li Almanyayê jî nadin wan. Bi kîdera cîhanê ve birevin em dê rêxistinên terorê yên PKKê û FETOyê (Cemaeta Gulen) xilas bikin.”
Wezareta Derve ya Almanyayê li ser hesabê xwe yê Twitterê ragihand ku “Balyozxaneya Tirkiyê” bo Wezareta Derve hatiye bangkirin û hişyarî bo Enqerê hatiye dayîn, ku çalakiyên wek bajarê Neussê dubare nebin.
Wezareta Derve ya Almanyayê dibêje: “Em li Almanyayê rê nadin gotinên provoke (têkdan) û nefretê. Bi awayekî rasterast ji balyozê Tirkiyê re hat gotin, siyasetmedarên Tirk tenê bi destûra Wezareta Derve ya Almanyayê dikarin çalakiyên hilbijartinê bikin.”
Wezareta Derve ya Almanyayê di daxuyaniya xwe de got: “Eger nûnerên Tirk rêkarên lîstikê cîbicî nekin, em dê encamên vê yekê binirxînin."
Çi bûbû?
Parlamenterê AKPê yê bajarê Nîgdeyê Mustafa Açikgoz roja 13ê Çileya 2023an li bajarê Neus ê Almanyayê beşdarî civîneke Konfederasyona Komeleyên Tirkên Nijdaperestên Demokratîk ên Almanyayê ya ser bi MHPê bû û li wir di axaftineke xwe de gef li endamên PKKê û Cemeta Gulen xwarin. Parlamenterê navborî dîmenên gefên xwe jî li ser hesabê xwe yê medya civakî belav kirin.
Açikgoz di axaftina xwe de bi eşkere gef li endam û alîgirên PKKê û Cemeata Gulen xwarin ku li Almanyayê niştecih in û got: “Çawa me li Tirkiyê mafê jiyanê neda wan, em li Almanyayê jî nadin wan. Me li Tirkiyê cih neda wan (endamên PKK û Cemeta Gulen) û me xilas kirin, bi izna xwedê li kîjan devera cîhanê bin em dê wan ji wan qulên ku xwe veşartine derxin û wan xilas bikin.”
Ev gotinên Parlamenterê AKPê li Almanyayê di nav beşek ji siyasetmedarên wî welatî de bû sedema karvedanan û beşek ji bikarhênerên medya civakî ew bi pêkanîna tawanê “nefret û kînê” tohmetbarkirin. Li aliyê din Parlamentera Almanyayê Rebecca Harms axaftinên Mustafa Açikgoz li ser hesabê xwe yê medyaya civakî belav kirin.
Rebecca Harms polîsên Almanyayê etîket kir û banga destpêkirina lêkolîneke yasayî derbarê wî de kir. Harms li ser hesabê xwe yê Twitterê li ser wan axaftinên parlementerê AKPê dibêje: “Tomarkirina gilî pêngaveke rast e. Ez hêvîdar im lêkolînek bê destpêkirin.”
