Serokê Herêma Kurdistanê Mesûd Barzanî duhî serdana Tirkiyeyê kiribû û bi Serokomar Recep Tayyip Erdogan re hevdîtinek pêk anîbû. Hûrgiliyên hevdîtina herdu serokan eşkere bûn.
Li gorî nûçeya Sevil Erkuşa rojnameya Hurriyetê, di hevdîtina Barzanî û Erdogan de vegera Pêşmergeyên Roj, li Iraq û Sûriyeyê tekoşîna rêxistina terorîst a DAIŞê û mijara petrolê hate nirxandin. Di 19ê Sabatê de jî Barzanî û Serokwezîr Binali Yildirim li Munihê di Konferansa Ewlehî de hevdîtinek pêk anîbûn.
DERBASBÛNA PÊŞMERGEYÊN ROJ
Di rojevê de plana vegera Pêşmergeyên Roj bo herêma Rojava heye. Heta niha Amerîka bi sedema ku we di navbera wan û PYDê de pevçûn derkeve destûra çûna wan nedaye. Wekî tê zanîn rojên borî di navbera ENKS û PYDê de ji bo vegera Pêşmergeyên Roj civîn hatibûn lidaxistin. Li gorî îdîaya Hurriyetê Enqere jî li plana vegera Pêşmergeyen Roj erênî difikire. Herwiha di hevdîtinê de pêşeroja petrola Kerkûkê jî hatiye nirxandin.
Serokê Herêma Kurdistanê Mesûd Barzanî berî serdana xwe ya Tirkiyeyê di axaftina xwe ya çapameniya alman de ragihandibû ku ji bo destpêkirina pêvajoya aştiyê divê pêşî Hevserokê HDPê Selahattin Demirtaş û parlamenterê girtî werin berdan.
